Kaltwasser-Grill-Challenge: Mia ham uns ned schwoam lossn ...
Rosenheim/Wasserburg - Grilln im koidn Wossa - und des bei Temperaturen im oastellign Bereich? Naa, mia san ned narrisch oder gar übergschnappt. Mia samma nominiert worn für de Koidwossa-Grill-Tschällenge...
Do flaggt a Würschtl, dort steht a Flaschl Bier. Neba da offna Autodia hod si a quietschrosana Flamingo mit am Strohuat breit gmacht, in am Plantschbecken schwimmt a Antn. Vokehrte Weid oder wos is do los?
Koa Panik, mia hamma freille a Erklärung für de varruckten Buidln: Da Hinterhof von unsana OVB24.de-Redaktion vowandelt si nämli in a Fuim-Areal.
Warum und wiaso? Mei, des hamma da guadn oidn Konkurrenz zum vodanken. Da Huaba vo da Wossabuaga Stimm hod gmoant, wenn er ins koide Wossa muass, dann deafan mia nadiarle aa ned vaschont bleim. Deshoib hod a uns nominiert in am Fäjsbuk-Fuim. Mia miaradns eam gleich doa und aa in da Käitn grilln, hods in seim gloana Fuim ghoassn - sunst warad ma eam a Grillfestl schuidig. Und des hamma ned auf uns sitzn lossn kena... Deswegn ham ma uns nadiarle aa ned lumpn lossn...
Wos steckt do dahinter?
Mia ois Online-Redaktion wissma, wos des Koidwossa-Grilln is, logo! Mia ham sogar schomoi separat in am Artikel erklärt um wos do genau geht und a boar vo de bärigsten Videos zamagsteit.
Ursprünglich hom se ja de Vereine gegenseitig nominiert. Burschen- und Dirndlvereine, Musikvereine, Trachtenvereine - und auf oamoi is des Ois voi durch'd Deckn ganga. Mei, und jetz hods uns hoit aa dawischt, as Team vo wasserburg24.de.
Und aa wenn de Musikkapein vo Großhoizhausn de Tschällenge vo Fäjsbuk offiziell beerdigt hod in eanam Video, lassma mia uns ned lumpen und ham de Herausforderung ohne lang zum Überleng ognumma.
wasserburg24.de hupft ins koide Wossa
De Idee fürn Fuim - spontan entstandn. Vo Ofang o war aba klar: De 24 muass im Mittelpunkt steh. Deshoib hamma exakt 24 Hoibe Bier und 24 Würschtel für unsan Mini-Kugelgrill kaaft. Strohhuat, Sunnabruin und Plantschbecken sorgn für des bassade "Summa-Filing". Zum Aufblosn hod de Friaschicht a Stund eher aufsteh miassn - da rosaroade Flamingo mua ja aa a guade Figur abgem. Mia hamma as zäin aufgheart, aba gwies 30 Moi samma glaffa, um as Plantschbecken mit koidm Wossa zum fuin.
Damit des Ganze ned grod zur Gaudi bassiert, hamma aa no den karitativen Hintergrund ned vogessn. Und deshoib spendn mia für jedn Damma hoch für unsa Video oan Euro an die Einrichtung "Silberstreifen" in Vogtareuth. Aba Obacht: Es geitn fei grod de Video-Likes auf da Fäjsbuk-Seitn vo wasserburg24.de.
Wia schaugt's aus? Hamma a bisserl a Naigier gweckt und woit's wissen, wen mia nahad nominiert ham? Schaugts es eich o:
mb